Marka globale New Deal Europe, partner kryesor i Panairit të Turizmit: Shqipëria dhe rajoni, destinacionet e ardhshme IN për pushuesit e huaj

Në ambientet e Pallatit të Kongreseve, më 14 dhe 15 tetor do të zhvillohet edicioni i parë i Panairit Tourism & Travel Show Albania 2022. Panairi më i madh në Shqipëri dedikuar turizmit rajonal, vjen si një event B2B në bashkëpunim me kompaninë lider të sektorit, New Deal Europe. Eventi dyditor do të jetë pika e takimit për profesionistët dhe bleresit nga e gjithë bota, që janë të interesuar për produktin tonë të përbashkët të destinacionit dhe perspektivën e rajonit. Konferenca dhe forume me personalitete ndërkombëtare të sektorit, sesione informimi, takime të hapura online, takime direkte me blerës të huaj, gjithçka në funksion të promovimit të Shqipërisë e vendeve të rajonit si destinacionet më të pëlqyera të turistëve.
Si eventi i parë më i madh i organizuar për turizmin, Iceberg Exhibition është përballur me jo pak sfida, por me mbështetjen e Ministrisë së Turizmit në Shqipëri, mbështetjen e New Deal Europe dhe shumë kompanive të tjera, Panairi “Turizëm Travel and Show Albania 2022” do të jetë një vlerë e shtuar për sektorin e turizmit shqiptar dhe një mundësi për të gjithë për të shkëmbyer e mësuar nga njëri-tjetri.
New Deal Europe, një markë globale
Me mbi tridhjetë vjet përvojë në turizëm dhe mbajtës të posteve të profileve të larta në industri, Robert Dee dhe Tine Murn janë partnerë biznesi dhe bashkëthemelues të New Deal Europe. Fillesat e kompanisë i përkonin më shumë idesë për të patur një panair turizmi për vendet e Evropës Juglindore, por që shumë shpejt do të zhvillohej në shumë më tepër. Të specializuar në përfaqësimin e bordeve turistike, hoteleve, kompanive të menaxhimit të destinacioneve dhe atraksioneve në tregjet kryesore globale, Robert Dee dhe Tine Murn mezi presin ta zgjerojnë edhe më shumë aktivitetin e tyre, teksa njerëzit bëhen më të vetëdijshëm për atë çka mund të ofrojë rajoni i Ballkanit.

Si filloi gjithçka?
Do të ishin dy guidat “Atraksionet më të bukura të Jugosllavisë” dhe “Perlat e Jugosllavisë”, akorduar Robert Dee-s, asokohe udhërrëfyes turistik për Cosmos Tourama në vitin 1985, shkëndija që bëri Dee-n të kuptonte lidhjen e fortë me rajonin e Ballkanit. Kur u kthye në Londër, Robert iu bashkua shoqërisë britanike-jugosllave e kur pas dy vitesh iu besuan guidat skandinave, ai kuptoi se ku e kishte zemrën, në Ballkan. Nëse për vite me radhë, gjithçka do të mbetej thjesht një lidhje e fortë shpirtërore me një rajon dhe asgjë më shumë, gjithçka do të konkretizohej dhe do të merrte formën e një projekti emocionues në eventin City Fair, organizuar nga Shoqata Evropiane e Turizmit. Nga rreth 200 delegatë, Roberti i cili përfaqësonte një hotel kroat dhe Tine një destinacion slloven, kuptuan se ata përbënin dy të tretat e përfaqësuesve nga Evropa Juglindore.

“Ne thjesht menduam se kjo ishte çmenduri, duke pasur parasysh se sa i madh ishte rajoni dhe çfarë potenciali të madh kishte, kështu që vendosëm të bënim diçka për të dhe të organizonim panairin tonë tregtar të turizmit të fokusuar në rajonin e Ballkanit.” shprehet Dee.
Një vit më pas, Robert dhe Tine do të zhvillonin eventin e tyre të parë, New Deal Europe Marketplace and Forum, në Londër. Të gjitha vendet ishin të rezervuara, por përhapja e pandemisë Covid-19 dhe mbyllja e vendeve në nivel mbarëkombëtar detyroi dy partnerët e biznesit të ‘zhyteshin’ në një botë ende në zbulim, atë virtualen. “Ky ishte një territor i panjohur pasi ne zhvillonim një nga panairet e para virtuale në turizëm dhe sigurisht që kishim anulime sepse njerëzit nuk e kuptonin se si do të funksiononte një panair virtual. Por kjo na dha edhe një mundësi unike.” Dee dhe Tine ftuan të gjitha kontaktet e tyre globale dhe papritmas New Deal Europe u bë një markë globale. “Tani jam i lumtur që mund të jap një kontribut për rajonin e njerëzit që dua dhe që më dhanë një fillim kaq të mbarë në turizëm dhe në jetë.” përfundon Robert Dee.

Një bashkëpunim i suksesshëm me Panairin “Turizëm Travel and Show Albania” në Tiranë
“Në New Deal Europe jemi entuziastë, të bashkëpunojmë e të jemi partnerë të panairit “Turizëm Travel and Show Albania 2022”. Ky është panairi i parë i turizmit në këtë format specifik në Shqipëri dhe për Iceberg Exhibition ne është një mundësi shumë e mirë për të punuar dhe për të patur si partner një markë globale.
Kompania lider në sektorin e turizmit do të sjellë elementët kryesorë të ekspertizës së tyre, blerës me potencial të lartë për t’u takuar me furnitorët lokalë dhe rajonalë gjatë takimeve të biznesit dhe gjithashtu do të ofrojnë një sesion me përmbajtje për çështje të rëndësishme si zhvillimi i turizmit në rajon.
“Ka qenë gjithmonë një ambicie e jona të zhvillojmë evente në rajon dhe të sjellim aktorët vendimarrës në sektorin e turizmit për të parë dhe përjetuar vendet që ne të dy aq shumë i duam. Ne e dimë nga përvoja jonë e organizimit të udhëtimeve, që sapo njerëzit kuptojnë një destinacion, ata kanë më shumë mundësi t’ua ofrojnë klientëve të tyre dhe nuk ka mënyrë më të mirë për ta kuptuar një vend sesa ta vizitosh vetë. Kur të takojnë njerëzit, të shohin atraksionet më të bukura, të shijojnë ushqimin dhe pijet, të afrohen me natyrën dhe të ndjejnë mirëseardhjen, ne e dimë që ata do të magjepsen. Ky panair, me udhëtimet e famshme post-event të organizuara nga Balkan Trips, na jep mundësinë ideale për të shfaqur të gjitha këto.”
Lidhur me pritshmëritë nga ky event, Robert Dee pohon se ky është eventi i parë i këtij lloji dhe përmasash në Shqipëri, ndaj është e rëndësishme të vendosen objektiva që janë të arritshme. Ajo që është kryesore në këtë event, është se potenciali i të pranishmëve është shumë i lartë. Nga ana blerëse ne po sjellin liderë në fushën e tyre, duke përfshirë liderin e tregut në aktivitetin e turzimit, operatorin më të madh turistik në botë, operatorin më të madh turistik në SHBA, operatorin kryesor në udhëtimet luksoze, si dhe operatorë të veçantë që mbulojnë një sërë sektorësh, përfshirë specialistë në udhëtimet e njerëzve me aftësi të kufizuara. “Pres që të ketë shkëmbime të mira informacioni dhe një mundësi që të gjithë të mësojnë nga njëri-tjetri, veçanërisht me sesionin tonë të përmbajtjes dhe të bëhen marrëveshje biznesi nga të cilat do të përfitojë Shqipëria dhe rajoni”.

E ardhmja e turizmit në Shqipëri
Sipas Robert Dee, Shqipëria është ende në fillimet e një rrugëtimi dhe ka mundësi të mëdha për t’u shndërruar në një destinacion ideal pushimesh. Ka gjithçka që kërkon turisti i shekullit të 21-të: një identitet unik kulturor, histori magjepsëse, gastronomi fantastike, verëra fantastike, plazhe të virgjëra dhe natyrë mahnitëse që ofron një sërë aktivitetesh. Shtojini kësaj, kryeqytetin, Tiranën dhe gjithçka që ofron si destinacion pushimesh për një fundjavë, dhe ja tek kemi një paketë fantastike. E rëndësishme është që zhvillimi të bëhet siç duhet, si për mjedisin natyror ashtu edhe për njerëzit që jetojnë këtu, në mënyrë që turizmi të rritet në mënyrë të përgjegjshme dhe të qëndrueshme dhe të mos shkatërrojë atë që tashmë kemi. “Nëse kjo ndodh, mendoj se Shqipëria do të jetë destinacioni tendencë i për një sërë sektorësh të turizmit.” përfundon Robert Dee.