Ekonomia qarkulluese, e ardhmja!

Në ditët e sotme, diskursi botëror në fushën e ekonomisë është zhvendosur drejt ekonomisë qarkulluese si një faktor dominant në zhvillimin ekonomik, rritjen e mirëqenies apo krijimin e vendeve të reja të punës duke ulur emetimet e gazrave serrë, mbeturinat dhe ndotjen. Paraqitet e pamohueshme rruga drejt tranzicionit të qëndrueshëm në prodhimin dhe përdorimin e energjisë. Referuar analizave të ndryshme të realizuara nga McKinsey, rreth 63 perqind e potencialit të reduktimit të emetimeve të gazrave bazohet në një energji me të pastër dhe më efiçente. Pjesa e mbetur, rreth 37 për qind, kërkon një qasje alternative të lidhur ngushtësisht me ekonominë qarkulluese. Kjo do të thotë që është reale nevoja e ruajtjes së vlerës së nevojshme të produkteve dhe burimeve për sa më gjatë të jetë e mundur. Zhvendosja nga ekonomia lineare drejt ekonomisë qarkulluese do të rrisë përdorimin e materialeve të ricikluara, do të reduktoje mbi-prodhimin dhe rrjedhimisht do të ndryshojë edhe sjelljen e konsumatorit. Ajo nënkupton një mënyrë të re se si prodhohen dhe konsumohen të mirat dhe shërbimet, duke krijuar një të ardhme më të mirë për biznesin, shoqërinë dhe natyrën në tërësi.

“Ndërtimi i themeleve të forta të ekonomisë qarkulluese kërkon veprim të koordinuar. Zhvendosja drejt modelit të ekonomisë qarkulluese do të ndikojë të gjithë sektoret dhe politikat përkatëse” -McKinsey, Qendra e Biznesit dhe Mjedisit, Tetor 2016
Zhvendosja nga ekonomia lineare drejt modeleve qarkulluese dhe të qëndrueshme të biznesit, do të nxisë kompanitë që të bëjnë diferencën në treg. Kjo qasje do të jetë një mekanizem i fortë për ta. Ky tranzicion kërkon investime në asete që sigurojnë norma të ulta emetimi, faktorizimin e materialeve, zinxhirin e furnizimit, etj. Zgjatja e jetës së produktit përmes përmirësimit të shërbimit, dhe rialokimit të mbeturinave është në thelb të filozofisë së re. Modeli linear i ekonomisë bën që prodhimi të realizohet nga lënda e marrë direkt nga mjedisi dhe e papërpunuar duke e shndërruar pas përdorimit në një mbetje që hidhet sërish në mjedis duke shkaktuar kështu ndotje dhe duke rritur mbetjet. Shkathtësia në përshtatjen e një qasjeje strategjike, identifikimin e fushave potenciale dhe shfrytëzimin e mundësisë për t’u përshtatur me kërkesat e të ardhmes janë detyrat kryesore të botës së biznesit.
Mjedisi do të përfitojë patjetër nga një ekonomi rrethore me në thelb të vet riciklimin dhe në të njëjtën kohë do të rrisë konkurrencën dhe elasticitetin. E ardhmja tregon se do të ketë ulje të emetimeve, efektet negative të të cilave duhet të merren seriozisht nga të gjithë dhe kudo. Burimet kryesore të uljes të emetimeve jane automjetet elektrike, të përbashkëta dhe autonome; zinxhirët ushqimorë rigjenerues dhe të shëndetshëm; banesa pasive; planifikimi urban; dhe energji e rinovueshme.